PR - 27.04.23
REBĦA GĦALL-ARTIJIET TAGĦNA
Il-Partit Nazzjonalista jilqa’ l-aħbar tal-eżitu tas-sentenza tal-Qorti tal-Appell favur il-Kunsill Lokali tal-Gżira u kontra l-Awtorità tal-Artijiet, li riedet tittermina parti mill-kirja ta’ Ġnien il-Kunsill tal-Ewropa fil-Gżira biex din l-art tintuża’ għar-rilokazzjoni ta’ pompa tal-petrol.
Il-Qorti rrimarkat li fi kwistjonijiet ta’ amministrazzjoni pubblika, hu meħtieġ grad mill-aktar għoli ta’ trasparenza, ta’ raġjonevolezza u ta’ ħarsien tal-prinċipji tal-ġustizzja naturali. Il-Qorti qalet li tqis li bħala minimu, kellu għall-anqas jinstema’ l-Kunsill Lokali, li kien qed jaġixxi fl-interess tar-residenti li jirrappreżenta meta oġġezzjona għad-deċizjoni tal-Awtorità.
Fis-sentenza tagħha, il-Qorti qalet ukoll li d-deċiżjonijiet tal-awtoritajiet amministrattivi, huma min huma, iridu jkunu trasparenti, korretti u raġjonevoli.
Wara l-isforzi tal-Kunsill Lokali, bl-appoġġ tan-nies li opponew dan il-proġett, il-Kunsill Lokali tal-Gżira ddefenda b’suċċess l-attentati biex l-art tittieħed lura mingħand il-pubbliku kontra l-persistenza tal-Awtorità tal-Artijiet, bl-Avukat Ramona Attard, li hi wkoll il-President tal-Partit Laburista.
L-Awtorità tal-Artijiet qed tagħmel kollox ħlief li tuża’ l-artijiet fl-aħjar interessi tal-poplu, tant li tilfet għal kollox l-iskop ewlieni tagħha. Sfortunatament, saret għodda oħra f’lista twila li l-Gvern juża’ f’kull opportunità possibbli biex jissodisfa lill-ispekulaturi. Minflok taderixxi mal-obbligi tagħha, l-Awtorita qed tinvolvi ruħha ta’ spiss f’deċiżjonijiet li jittieħdu mingħajr l-ebda spjegazzjoni loġika. Dan filwaqt li jispikkaw is-segretezza u n-nuqqas ta’ trasparenza f’din l-Awtorità.
Il-Partit Nazzjonalista jfakkar li deċiżjonijiet bħal dawn, li ħadet l-Awtorità, iħallu effett permanenti u għalhekk, m’għandhomx jitfajru bl-addoċċ mingħajr wisq konsiderazzjoni dwar ir-riperkussjonijiet, bħal ma saret in-norma.
Rebekah Borg
Kelliem għall-Artijiet u d-Drittijiet tal-Konsumatur
Darren Carabott
Kelliem għall-Gvern Lokali u l-Amministrazzjoni Pubblika