PR - 14.04.23

Il-Gvern ta’ Robert Abela jkompli tinjora u jagħti bis-sieq lill-isport lokali

Imdorrijin naraw lill-Gvern ta’ Robert Abela u lill-awtoritajiet jużaw u jagħtu bis-sieq lill-isport lokali u lill-volontarjat.

Bl-azzjonijiet tagħha, l-Awtorità tal-Artijiet qed tkompli tippreferi lil min irid jiggwadanja minn fuq il-pubbliku inġenerali u minn għaqdiet sportivi, volontarji u li ma jagħmlux profitt.

Minflok rat kif tirranġa “żball” li għamlet biex forsi jintrebħu xi voti meta tat iċ-ċwievet ta’ maħżen fil-Port il-Kbir lil Klabb Regatta Birżebbuġa minngħajr l-ebda titolu, l-Awtorità tal-Artijiet issa qed tiżgombra lill-Klabb biex il-maħżen ikun ikkummerċjalizzat. Dan b’detriment għall-isportivi li jeħtieġu spazji bħal dawn biex ikomplu jrawwmu t-talenti tagħhom.

Dan mhux każ iżolat. Numru ta’ sailing clubs qed ikunu totalment injorati mill-Awtorità tal-Artijiet, bil-kapaċità tagħhom li jikkompetu fl-ogħla livell titpoġġa taħt theddid serju.

Għalhekk, il-Partit Nazzjonalista jinsisti li l-Gvern għandu jsib soluzzjoni biex jipprovdi lil dawn l-assoċjazzjonijiet sportivi bil-bini u l-faċilitajiet li jeħtieġu u ma jiffavorixxix l-ispekulaturi għad-detriment ta’ dawn l-organizzazzjonijiet sportivi.

Il-Gvern irid jirrealizza li mhux kollox għandu jdur madwar il-valur tal-flus għax il-kontribut tal-għaqdiet sportivi hu imprezzabbli. Spazji bħal dawn huma investiment fil-kultura u fl-isport lokali bħala parti integrali minn dak li jagħmilna Maltin.

Il-Partit Nazzjonalista jinnota li l-Awtorità tal-Artijiet ta’ sikwit titħalla tiddetta l-verżjoni ta’ kif iseħħu l-affarijiet minħabba li l-ħabi u s-segretezza saru l-ordni tal-ġurnata f’din l-Awtorità. Il-Partit Nazzjonalista jenfasizza li l-Gvern ta’ Robert Abela għandu jieqaf jgħatti x-xemx bl-għarbiel u jibda jirranġa l-prijoritajiet tiegħu, filwaqt li jpoġġi l-interess u l-ġid komuni qabel l-interess ta’ xi wħud.

Rebekah Borg

Kelliem għall-Artijiet u d-Drittijiet tal-Konsumatur

Graham Bencini

Kelliem għall-Isport u x-Xandir Nazzjonali

Stanley Zammit

Kelliem għall-Ippjanar, ir-Riċerka u l-Innovazzjoni