PR - 09.02.23

Il-bdiewa u r-raħħala qed jitħallew fl-għama dwar it-tibdil fil-Liġi tal-Qbiela

Filwaqt li mill-bieraħ, it-8 ta’ Frar, daħlet fis-seħħ il-Liġi tal-Qbiela, il-bdiewa għadhom isaqsu l-istess mistoqsijiet li għal xhur sħaħ baqgħu mhux imwieġba mill-Gvern. Mistoqsijiet li għandhom impatt kbir fuq l-għajxien tal-bdiewa u r-raħħala, kif ukoll l-abbiltà tagħhom li jkomplu jaħdmu r-raba’.

Numru ta’ mistoqsijiet kruċjali għadhom mhux mwieġba. Min jikri r-raba’ tal-privat għadu ma jafx kif ser ikun determinat il-valur tal-art agrikola biex fuqha jkun jista’ jinħadem il-prezz ta’ kirja ġusta meta sid il-kera jagħmel Rikors quddiem l-istess Bord.

Din il-Liġi waħedha ma tipproteġix lill-bdiewa u lir-raħħala tagħna jew lill-produzzjoni tal-ikel. Sfortunatament, erba’ emendi li ppreżenta l-Partit Nazzjonalista fi Stadju ta’ Kumitat biex intejbu l-Liġi kienu injorati mill-Gvern u għalhekk, Robert Abela u sħabu għażlu li ma jindirizzawx dawn l-inċertezzi kollha tal-bidwi u r-raħħal.

Min-naħa l-oħra, il-Partit Nazzjonalista jibqa’ kommess li jagħti l-kontribut tiegħu kull fejn ikun meħtieġ biex ikunu ssalvagwardjati l-interessi tal-bdiewa u r-raħħala tagħna.

Toni Bezzina

Kelliem għall-Agrikoltura u s-Sajd

Rebekah Borg

Kelliem għall-Artijiet u d-Drittijiet tal-Konsumatur