PR - 13.02.23
Il-Gvern jgħid ħafna dwar il-Green Projects imma jgħamel il-kontra
Fl-istess ħin li b’ħafna pompa l-Gvern kien qed joħloq l-aġenzija Project Green, li hi afdata b’fond ta’ €700 miljun biex tipprovdi spazji miftuħa ġodda fil-lokalitajiet tagħna, il-Gvern kien qed jipprepara tender biex ibiegħ art kbira tal-Gvern stess li tkun żviluppata fi djar u ħwienet.
Il-ħruġ għal bejgħ b’tender ta’ art tal-Gvern ta’ 4,800 metru kwadru fil-Mellieħa mid-Dipartiment tal-Artijiet, biex tkun żviluppata f’zona residenzjali ta’ tliet sulari u 500 metru kwadru fi ħwienet, bi 30% biss mill-5,300 metru kwadru biex jitħalla bħala spazju miftuħ, imur kompletament kontra dak li ilu jwiegħed il-Gvern.
Aktar minnhekk, fl-aħħar jiem, wara li pprova jirredikola lill-Partit Nazzjonalista, il-Gvern ħareġ jaqbel mal-proposta tal-Partit Nazzjonalisra, li l-Gvern għandu jixtri artijiet mhux żviluppati propju biex idawwarhom fi spazji miftuħa.
F’dan il-każ, il-kontra ta’ dak li sar fi Ġnien Victor Calvagna fil-Mosta, il-Gvern qed ibiegħ art li diġà hi tiegħu biex tkun żviluppata mill-privat.
Il-Partit Nazzjonalista jfakkar li bil-policies li għamel Gvern Laburista, drive-ins tal-garaxxijiet, parapetti u bankini wesgħin, f’numru kbir ta’ każi, ġew meqjusa bħala parti mill-persentaġġ tal-art li għanda titħalla bħala spazju miftuħ.
Dawn il-kontradizzjonijiet huma turija ċara ta’ Gvern mingħajr direzzjoni, fejn Ministru jinjora dak li qed jgħid li jixtieq jagħmel Ministru ieħor.
Din il-wegħda tal-Gvern Laburista li jsiru spazji miftuħa biex jagħmlu tajjeb għall-iżvilupp hi waħda ipokrita.
Il-Partit Nazzjonalista jinsisti li, biex il-wegħda tal-“infrastruttura għall-ambjent” tittieħed bis-serjetà, qabel kollox, il-Gvern għandu jara li art tal-Gvern applikabbli jinbidlilha l-istatus tagħha għal waħda mhux żviluppabbli.
Rebekah Borg
Kelliem għall-Artijiet u d-Drittijiet tal-Konsumatur
Janice Chetcuti
Kelliem għall-Ambjent, il-Ħolqien ta’ Spazji Ġodda u d-Drittijiet tal-Annimali
Stanley Zammit
Kelliem għall-Ippjanar, ir-Riċerka u l-Innovazzjoni