PR - 14.10.22

Appell biex l-artijiet tal-Gvern jintużaw fl-aħjar interess tal-pubbliku u mhux biex jimpalaw il-flus il-ftit tal-qalba

Ftit tal-jiem ilu, il-Prim Ministru Robert Abela ħabbar li l-Kabinett approva tliet proġetti li għalihom se jkunu qed jinħarġu sejħiet pubbliċi biex il-binjiet tax-Chalet, tal-Pixkerija u Evans Building ikunu żviluppati mill-privat.

Filwaqt li jaqbel li għandu jkun immassimizzat l-użu tal-art pubblika, il-Partit Nazzjonalista jesiġi li dan għandu jsir bl-akbar attenzjoni possibbli.

U filwaqt li ma jara xejn ħażin li jkun hemm proġetti ta’ investiment fuq art tal-Gvern sakemm dan isir għall-benefiċċju taċ-ċittadini li jħalsu t-taxxi u li fl-aħħar mill-aħħar huma s-sidien ta’ dawn il-propjetajiet, il-Partit Nazzjonalista jappella biex is-sejħiet pubbliċi jkunu totalment trasparenti u ma jintużawx bħala eżerċizzju li jissodisfa r-regħba li ħakmet lil dan il-Gvern.

Il-Partit Nazzjonalista jtenni li dawn għandhom ikunu proġetti li jħallu impatt pożittiv fuq id-dehra u l-kwalità tal-ħajja tal-madwar. Barra minn hekk, jappella lill-Gvern biex ikun kreattiv u ambizzjuż fil-proġetti li japprova u juri li kapaċi jħares lil hinn minn sempliċiment l-industrija tal-catering u tal-ospitalità.

L-artijiet tal-Gvern għandhom jintużaw skont il-potenzjal sħiħ tagħhom fl-aħjar interess tal-pubbliku u mhux biex jimpalaw il-flus il-ftit tal-qalba, li għandhom mottivi oħrajn.

Taħt dan il-Gvern, l-indħil politiku kien prominenti fl-Awtorità tal-Artijiet, speċjalment fi proġetti kontroversjali bħall-Australia Hall. L-istorja riċenti tal-Gvern Laburista urietna l-perikli li jġibu magħhom deals li twieldu fil-ħabi u segretezza. Għaldaqstant, il-Partit Nazzjonalista jibqa' kommess li jżomm lill-Gvern kontabbli biex jiżgura li ma jkunx hemm min jipprova jinqeda b’dawn il-progetti għal skopijiet oħrajn.

Rebekah Borg

Kelliem għall-Artijiet u d-Drittijiet tal-Konsumatur