PR - 09.11.22

Deċiżjoni li hi riżultat tal-arroganza tal-Gvern

Il-Partit Nazzjonalista, għal darb’oħra, ingħata raġun meta qal li l-ftehim li għamel il-Gvern Laburista fl-2020 biex tingħata art pubblika fl-Miżieb u l-Aħrax kellu jkun disponibbli għall-pubbliku qabel kien iffirmat.

Illum, il-Qorti qalet li dan il-ftehim ġie ddikjarat null għax kellu jsir b’att pubbliku u ma segwiex ir-regoli meħtieġa meta tiġi trasferita art pubblika.

Il-Partit Nazzjonalista jinnota kif l-arroganza reġgħet spikkat f’dan il-każ meta l-Gvern naqas li josserva r-regoli li qegħdin hemm biex jassiguraw ir-responsabbiltà u t-trasparenza tal-istess Gvern fil-ħidma tiegħu.

It-trasferiment tal-art kellu jkun skrutinizzat mir-rappreżentanti parlamentari u mill-opinjoni pubblika. Iżda minflok, il-ftehim sar b’kitba privata, fil-moħbi, mingħajr l-ebda preżenza tal-media u mingħajr konsultazzjoni pubblika jew dibattitu parlamentari.

Deċiżjoni bħal tal-lum hi r-riżultat ta’ meta l-Gvern jagħżel it-triq tal-arroganza.

Rebekah Borg

Kelliema għall-Artijiet u d-Drittijiet tal-Konsumatur