PR - 27.08.22

L-ispazji miftuħa għandhom jitħallew ħielsa biex jitgawdew mill-pubbliku

L-applikazzjoni ta’ Transport Malta biex jinbnew uffiċini u ristorant massiv max-xatt Ta’ Xbiex hija ta’ theddida fuq l-ispazji pubbliċi li diġà huma nieqsa minnhom ir-residenti. Każ ieħor f’lista twila ta’ theddid fuq l-ispazji miftuħa.

Issa jmiss madwar 600 metru kwadru ta’ art bejn il-ġnien tal-Gżira u l-moll tal-yacht marina. Art li skont il-local plans hija spazju pubbliku miftuħ, u għalhekk m’għandhiex tkun soġġetta għal żvilupp.

Jekk isir, dan l-iżvilupp se jkun qiegħed jimblokka x-xatt u jkompli jiggrava l-problemi tat-traffiku u l-parkeġġ f’dawk l-inħawi.

Nisimgħu ħafna li għandna bżonn nipproteġu l-ispazji pubbliċi imma qegħdin naraw diskrepanza bejn il-kliem u l-fatti. Bħala Partit Nazzjonalista u bħala Oppożizzjoni, nappellaw biex dan il-proġett ma jsirx u l-ispazji miftuħa jitħallew ħielsa biex jitgawdew mill-pubbliku. Mhux kull biċċa art irridu bilfors nisfruttawha.

Rebekah Cilia

Kelliema għall-Artijiet u d-drittjiet għall-Konsumatur

Janice Chetcuti

Kelliema għall-Ambjent, Ħolqien ta’ Spazji ġodda u Drittijiet tal-Annimali

Stanley Zammit

Kelliem għall-Ippjanar, ir-Riċerka u l-Innovazzjoni